【科技籽：發燒專科】
舊式遊戲主機如超任及紅白機等，近年有價有市，不過日前途經旺角信和，驚見幾台極罕古董珍品，並非老任或世嘉出品，而是剛剛被人世紀大收購的Sharp！原來這個成立於1912年的百年老牌也曾生產電腦和遊戲機，而且件件保值，如今市價約一至五萬，屬大熱藏品。雖然外間有傳Sharp負債逾百億港元，看似落泊得很，但在2000年之前，它的創新風格曾為世界帶來不少便利，計數機、液晶電視、影相手機等可謂周身刀張張利，輝煌歷史值得大家回味。
遊戲店電氣良品店主馬狄文（文哥）對Sharp遊戲機情有獨鍾，單是市值約5萬元的紅白機電視C1已有兩台，超任電視SF1目前也近1萬5千元。而他最愛的是1987年推出的電腦X68000，因為機能出眾，被追求畫質的機迷奉為夢幻主機，當年機迷無不夢想擁有，但卻不是人人買得起，「當年日本電器唔做出口，機票貴、電腦又大部，冇人會飛去日本買，係得深水埗黃金有得賣，賣成萬幾蚊一部，當年萬幾蚊喎，你話幾犀利！」
搶先輸出RGB 畫質超班
這幾台Sharp遊戲機如今炒得起，除了罕見，還因為當年Sharp的高超技術，「當年Sharp呢幾部機嘅技術真係超班，就算同任天堂合作將紅白機、超任裝落電視，佢都升級到RGB輸出，畫質同原本有好大分別，係得佢哋先有，所以到今時今日都有人搶住要。」無論是X68000、C1或SF1，均採用RGB輸出，同年代的紅白機、超任則用上較差的AV輸出。記者試用C1及紅白機玩《孖寶兄弟》，明顯看出畫質分別，C1不但顏色鮮艷豐富，點陣圖的線條亦清晰分明得多。而X68000的機能當年更達街機級，解像度為768×512，發色數為65,536，遠比解像度為512×448、發色數為32,768的超任優秀。
Sharp長年跟任天堂合作，後來PlayStation崛起，任天堂對家用機市場的影響力逐漸減退，Sharp也沒有繼續生產主機及電腦。說到對Sharp的評價，文哥認為它在很多地方都快人一步，「就算後來冇出遊戲機，Sharp嘅TFT薄芒都多人用嚟打機，仲有佢嘅Black TFT技術，處理黑色真係好靚。」對於被鴻海收購，文哥表示不太擔心，因為Sharp的液晶屏幕技術仍很了得，但應難復當年勇、再度於遊戲機及手機市場佔一席位。
個名來自鉛芯筆 創立歷史夠勵志
Sharp點解叫Sharp？原來因為佢出咗支鉛芯筆叫Sharp！創辦人早川德次是做金工出身，1915年發明了「早川式繰出鉛筆」（繰出鉛筆即鉛芯筆，繰出有不斷重複之意），自此打破了鉛芯筆無法收回筆芯的設計，乃文具迷心中的神筆。文具店Hue of S店主Leo亦因此了解到Sharp成立初期的感人血淚史，「呢支筆好有歷史價值，後來改名叫做Ever-Ready Sharp Pencil，亦係Sharp嘅由來。不過Sharp後來冇做文具，因為1923年關東大地震，早川嘅廠房爛晒，妻子又離世，可謂家破人亡。版權同公司資產都賣晒畀人，帶住14位員工喺對手日本文具製造社工作。但佢冇放棄，做咗兩年，又同埋呢班員工一齊離職去大阪成立新公司。」這間早川金屬工業研究所後來研發礦石收音機取得成功，1925年易名為Sharp。
Leo本身亦是Sharp的支持者，卻不是因為經典的早川式鉛筆，而是覺得它的產品夠創新，「我諗廿年前，當時流行電子手帳PDA，嗰時Sharp嘅PDA有個插卡系統，換卡就可以變功能，做電子辭典或者電子日記都得。當年賣成三、四千蚊真係好貴，但你又會覺得好勁肯畀錢。另外Ultra Slim手提電腦都係Sharp出先。」
提到近年Sharp日漸衰落，Leo認為關乎日本人的做事作風，「我覺得日本人做事追求極致，新技術一定要做到最好先推出市場，跟唔到潮流，中國、韓國嘅電子產品都係先推出市場再慢慢調整。」惟他覺得收購對雙方來說都是好事，「冇辦法，鴻海出個價比日本半官方嘅『產業革新機構』高出100億港元，其實係各取所需，鴻海作為iPhone屏幕供應商，需要Sharp嘅液晶技術，Sharp就要錢還債。我覺得對Sharp係好事，台日關係良好，相信收購之後唔會淨係食咗佢啲技術，我估Sharp仍然會有自主權。」
10大經典產品
1953年
日本首台民用電視 TV3-14T
很多人也是由電視認識Sharp，品牌於1953年推出首部電視，是日本首部民用電視產品，售價為175,000日圓，但當時高中畢業生的月薪只有約5,400日圓。
1962年
引入微波爐 R10
雖然歐美在四十年代已有微波爐，但因售價偏貴，到六十年代才由Sharp引入日本，微波煮食始在當地普及。
1973年
LCD計數機 EL-805
六、七十年代，Sharp開始研發集成電路及LCD液晶屏幕技術，把計算機改良成手掌般大小。
1982年
電腦電視二合一 X1
除了紅白機電視、超任電視，還有X1電腦電視，不只二合一，還能以畫中畫同時顯示電腦及電視畫面，此技術也是由Sharp首創。
1987年
引領PDA風潮 PA7000
八十年代Sharp開始推出電子辭典及電子手帳PDA產品，1993年Apple推出Newton，Sharp也有提供硬件及軟件技術。
1992年
LCD攝錄機 ViewCam
1992年推出的ViewCam是一部裝有LCD電子屏幕的Hi8錄影帶攝錄機，到了1995年Casio才推出第一部有電子屏幕的數碼相機。
2000年
首部影相手機 J-SH04
為世上首部有拍攝功能的手提電話，當年的鏡頭為110,000像素，已經可以用email發送相片。
2000年
過濾禽流感 FU-L40X
Sharp的空氣清新機獨創「離子簇」（Plasmacluster Ion）技術，以正負離子清除空氣中的有害物質，研究報告指能過濾H5N1禽流感。
2006年
摺機睇電視 905SH
智能電話流行前，港日大吹摺機風，Sharp曾是日本最受歡迎手機品牌，它的摺機外形獨特，這部905SH能扭成橫芒收看日本電視，夠破格。
2008年
108吋大電視 LB-1085
Sharp的LCD液晶屏幕技術一直處領先地位。2000年，各品牌曾掀起電視大戰，Sharp這台108吋大電視一度成業界新標準，但近年Samsung的110吋電視已經超越了日本老前輩。
記者：司徒港燊
攝影：潘志恆
編輯：陳國棟
美術：孔文彬