李斯特城要首奪英超只差一勝，下周日作客曼聯贏波就可以達成壯舉。李城球會本來打算號召球迷一齊嚟皇權球場見證歷史一刻，喺球場透過大屏幕直播曼李戰，不過得唔到英超賽會批准。根據英超直播協議，球賽唔可以公開現場播放，以保護電視台嘅利益，話之你李城要創歷史。其實李城本身有搞小型直播聚會，喺球會內招待球迷睇作客對曼聯以及車路士兩場波，收費只係三至五鎊（34至57港元），但只能夠容納大約1,600人。
另外，李城喺今季掀起英超旋風，唔少人都視陣中首席射手占美華迪為偶像，當地有球迷仲成功說服佢另一半，喺佢哋之間加入華迪！唔好誤會，只係呢位叫馬列奧特嘅粉絲，將「華迪」作為佢未出生囡囡嘅中間名（middle name），而佢伴侶全家都係熱刺球迷；仲有媒體將華Dee個樣key咗落BB度㖭（圖）。