梁特一家嘅機場行李風波，似乎未有隨機管局發表報告而平息喎，皆因當日有啲內容，梁特都唔多認同。而人稱飛天朱嘅前港區人大代表朱幼麟（圖）呢，喺呢件行李風波中都擔任重要角色噃，因為佢之前參加過機場集會，仲踢爆梁特喺行李風波涉嫌濫權㖭！
自稱「大話朱」
正所謂得罪方丈邊會有好日子過？難怪《文匯報》早前都登咗一篇評論文章，鬧飛天朱係「大話朱」，搞到仍然身在海外嘅飛天豬，一直心繫香港嘅行李風波，而佢又豈是省油的燈？
八方之前預告過，飛天朱外遊至5月3號返港，原來佢已經決定「返嚟就郁」，返港翌日即係4號就會舉行記者會，而記招主題係「大話朱回應《文匯報》」，係咪夠晒幽默？八方聽聞記招地點都定咗，真正嚟料；唔知《文匯報》有冇新一輪劏豬行動？