新免費電視台的《跟住矛盾去旅行》，概念確係新鮮過癮；如有電視台能照辦煮碗，找來足球界冤家齊齊去旅行，肯定世界各地都爭住播。首選組合當然是堅尼與韋拉，這對中場悍將當年場上有幾凶狠不用多說，最適合的旅行任務是到外地醫院，探訪踢波時被踢至重傷的球員，順便要韋拉訪問堅尼：「當年你報復式踢斷夏蘭特隻腳，有無懺悔？」堅尼點答大家當然估到，最想睇佢哋講講吓自己大打出手箒。
第二對是施丹與馬特拉斯。06世盃決賽的世紀「頭槌」，令施丹職業生涯最後一戰領紅蒙污、亦令馬特拉斯被永久標籤為大反派。他們應該於旅行任務中，一個教小朋友頂頭槌，一個教心口控球，教導小朋友球場上心口和頭的正確用法。可惜這對組合似乎無可能實現，兩人事後仍公開不和；馬特拉斯推出《我向施丹說了甚麼》一書籌款，本想幽默地做做善事，但傳到施丹耳邊卻被曲解成：「還用此事『搵錢』，肯定係卑鄙小人！」現實世界的矛盾，那有這麼易解決？
除了球員，又怎可少了領隊代表：摩連奴（右）與雲格（左）！兩人的旅行任務應先到各自球會的獎品室抹獎盃，等摩佬「牙擦」一下：「你睇我啲盃多你幾多，抹到我手軟呀！」之後再要兩人到職業介紹所打工，等雲格反問摩佬：「話時話，你記唔記得自己俾人炒過幾多次？」包保火花四濺！
足球,跟住矛盾去旅行,堅尼,韋拉,摩連奴,雲格,施丹,馬達拉斯
方栢翹
now足球評述員