【親子籽：教養之道】
香港地，單靠一份糧來養活一家幾口，以前其實好閒，但如今百物騰貴，兩公婆齊齊出去打工，都未必夠全家人過上安穩生活。但有一對八十後夫婦卻反其道而行，深信孩子頭幾年最需要父母陪伴，年前決定雙雙辭工回家當全職爸媽，聽落超「離地」。以為他們「有錢就是任性」，其實每日家用只有$100，計過度過慳住使。他們視這段日子為"Gap Year"，放個長假伴着孩子成長，縱然閒言閒語及反對聲音不絕於耳，但畢竟條路自己揀，至今走了一年多，仍覺無悔。
起初看到育有兩名兒子、今年35歲的Warren及34歲的Cass，在網上分享他們年多以來的全職爸媽生活，腦海只想起兩個字──離地。這年頭，容許另一半辭職回家湊仔，已不是人人有勇氣、頂得住，何況兩人齊齊辭工？
Warren原在泰國旅遊局任職，每月有近一半時間不在港，Cass則是測量師，同樣需要間中出差，陪伴兒子的時間少之又少。2012年大仔諾諾出生時，Cass已想回家當全職媽媽，曾與丈夫商量，卻被對方一盤冷水照頭淋，「佢當時嘅反應係覺得冇需要，仲問我自己湊同姐姐湊有乜分別？不如多個人出去搵錢。」2013年年尾，Warren的工作合約完結，加上年近80歲的爸爸身體欠佳，身為孻仔的他決定趁機做孝順仔，帶爸爸坐郵輪去旅行。
丈夫偷步唔撈 唔怕做壞榜樣
回港後繼續唞唞，只當兼職，變相多了時間在家陪伴兒子，父母觀開始有微妙改變，「以前覺得小朋友俾姐姐湊都會曉行曉大，睇得好輕，同小朋友嘅bonding唔會特別大，但嗰段時間同佢哋多咗互動，關係親密咗，覺得父母陪伴仔女成長真係好重要。」結果他趁年輕，又趁着與太太搬屋賣樓賺來的一筆積蓄，鼓起勇氣回家試當全職爸爸。
Cass眼見當初反對自己的丈夫，竟偷步回家做湊仔公，她說當時其實有啲𤷪，但又開心見到對方的轉變，「冇諗過佢會放低工作同所謂男人嘅尊嚴做全職爸爸，做太太見到另一半咁錫小朋友同顧家係開心嘅。」當時，Warren會不時傳來一些父子同樂的生活照給仍有上班的太太，Cass既羨慕又妒忌，去年忍不住再向丈夫提出當全職媽媽的念頭，終得到不一樣的答案，「佢話想就辭職返嚟，計過數只要慳慳哋，積蓄都夠一家使兩年。」就這樣開始了一家四口日日全天候黏在一起的生活。
他們仍記得親友得悉後的反應，「有啲會話使唔使咁誇張呀？你哋夠錢使㗎喇？啲錢邊度嚟？諗住成世都唔做嘢呀？」家人目前仍會間中試探他們何時重投職場，Cass直言最初會覺得難受，但現時已看開，「大家價值觀唔同，有人覺得生小朋友供書教學，請人照顧已經好足夠，但我哋唔想將管教小朋友嘅責任交畀人，呢個係父母嘅責任。」但兩公婆日日賦閒在家唔返工，不怕給兒子壞榜樣嗎？「阿仔有時反而會問點解人哋父母要返工，好似覺得父母陪自己係天經地義嘅事，返工先係奇怪，我同佢哋講知唔知父母好錫你哋、好幸福。其實我哋喺屋企唔係好食懶飛、日日睇電視打機，而係同仔仔一齊生活過日子，有好多互動。」Warren再補充：「唔知佢哋大個咗會點睇返呢段童年回憶，就算唔記得都唔係重點，至少對我哋兩個嚟講係個珍貴回憶，得着係無價寶。」
執石玩水又一日 夫婦共對要磨合
二人相識之前，曾各自到澳洲參加工作假期，靠當時賺的薪金，再加回港後儲了幾年錢，數年前用百多萬買了人生首層物業，其後搬屋賣樓賺了點錢，便成了他們現時的生活費。昔日兩人每月收入合共約有六、七萬元，辭職後，生活還是要過，樓要繼續供，長輩家用要繼續畀，還要養兩個兒子，條數點計？老本會有用完的一日，所以用錢時樣樣都要計住，Warren每星期（只計一至五）給太太$500家用，負責全家人一日三餐及日用品，由於住在偏遠村屋，去就近街市都要揸車，為慳錢，Cass會盡量在半小時內買完餸，以享受首半小時免費泊車的優惠。他們又幾乎不會買新衫及玩具給兒子，慶幸有幾個年齡相近的堂哥表哥，可以執二攤。一家人每天的活動接近零消費，大仔中午放學回家吃過午飯後，便會一家人到附近的石灘執石頭玩水、踩平衡車、在天台種水耕菜、用廢物自製玩具，甚至幫爸爸洗車就過一日，不花分文，廉價但快樂。
最初當上全職父母很大壓力，因為還未掌握新的使錢模式，Cass以前每月花一、兩千元買幾件新衫化妝品是等閒事，但現時一分一毫都要諗過度過，最深刻的一次是，她在連鎖店買了兩件價值$89的衣服給兩個兒子，卻換來丈夫痛罵，「佢話你知唔知今時唔同往日，唔係想買就買，嗰時我條氣好唔順，唔明點解買件衫畀仔仔都好似會搞到聽日冇飯開咁！佢仲話：『你要過返呢種生活冇問題㗎，聽日去返工咪得囉！』」Cass最終硬着頭皮去退款，Warren說：「嗰時覺得佢唔識量入為出，又要享受同個仔嘅親子時光，但又唔放棄物質，魚與熊掌喎，你要買咁多嘢，得，返工囉，好正路箒，一係你返，一係我返，如果你唔肯慳，錢邊度嚟呀。」他們初期還會做些兼職幫補家計，幾天的活動統籌、小學補習導師，就連通宵更的月餅製作員也做過。
除了慳錢，全職湊仔最大的挑戰不是如何安排每天活動，而是要習慣兩夫妻每日24小時相處，以前各自返工，有私人時間唞唞氣，如今日見夜見，磨擦自然增加，花了很長時間去磨合，現時每逢兒子午睡，就是他倆的小息時間，會把握時間上網打機，或去附近餐廳拍拖吃個下午茶，「仔女大個會離開，但伴侶會陪伴終老，唔可以因為小朋友而放棄伴侶關係。」Warren說。
盼齊做半職 伴孩子成長
我悄悄問Cass，其實內心想老公快點出來工作嗎？她憶起當初友人勸阻她做全職媽媽，「佢哋話得一個人搵錢，另一半會覺得你冇用，未必體諒。我𠵱家好享受見到爸爸同對仔仔嘅相處，如果有得揀，我會想兩個人同一時間做半職，大家都有時間參與小朋友嘅成長。」他們認識一對達至財務自由的港人夫婦，辭職帶着兩個年幼兒子到世界各地旅居，過着超離地、人人夢寐以求的生活，Cass說：「其實有咁樣財政能力嘅，香港大有人在，但有幾多父母會願意跳出comfort zone做呢件事？」
但現實終歸現實，二人總有重返職場的一日，會是何時？Warren笑說：「冇錢囉，最遲等兩個仔升小學啦。」但空白了幾年，在現實的香港社會，有可能會影響搵工，「返工飛嚟飛去係咪就代表充實人生？以前喺澳洲工作假期，好多舖頭星期六、日下午會關門，因為要family day，好悠閒，人哋都一樣生活得好好。」他們對自己能力有信心，加上相信在香港不會餓死人，只要肯做，一定有工返，就算要轉行、減人工、甚至再由低做起都在所不計，哪怕浪費了以前積累的經驗及人脈，「做嘢做到死嗰日都可以繼續做，但小朋友要你陪就只有呢幾年，成長時光唔會因為你忙、要工作賺錢而暫停，我哋覺得𠵱家同小朋友相處係無價，無悔無憾。」
部份圖片由受訪者提供
記者：黃子配
攝影：鄧鴻欣
編輯：陳國棟
美術：吳子豪