岑潔儀（Zoey）舊年1月為大馬富商老公Dixon生咗個印餅嘅仔Damien，眨吓眼Damien已經15個月大，Zoey亦fit到好似未生咁，一星期前佢喺澳門以圖為證，着起黑色連身透視泳裝嘅Zoey依舊性感。
計劃再添丁
有仔萬事足嘅Zoey，幫個仔改咗個乳名叫做「小老闆」，佢接受本報訪問話只要老公公幹地方適合，都會帶埋囝囝去旅行：「之前去澳門，今次帶咗佢去新加坡玩動物園同水族館，佢玩得好開心，見到啲動物就大嗌，追住啲魚魚喺度跑好開心呀！」
Zoey之前獲老公用6位數字投資自家設計珠寶系列ZO2，咁湊仔同做嘢點樣分配呢？佢話：「當然我係以湊小朋友為主，之後先會做嘢，嚟緊都有新計劃，會出本書關於餵哺母乳，同埋跟小朋友嘅親子關係嘅分享。」Zoey話唔想錯過囝囝成長過程，所以每日都會陪伴囝囝。Damien似足老公，咁Zoey有冇打算生番個餅印女，佢話：「想等Damien再大多少少先，計劃呢兩年會再生。」
撰文：馮仁昭