為咗抗衡領展欺壓小市民嘅惡行，一班年輕嘅泛民主派直搗領展攤牌。而今次嘅行動，更加令呢班泛民明白到，何解領展平日嘅惡行，可以咁離地，視民生於不顧？
因為佢哋今日終於發現咗，原來領展嘅總部入面，好多會議室均以行星命名，而領展討論點樣賺到盡嘅會議，隨時喺「火星」討論。
發起今次行動之一嘅民主黨南區區議員區諾軒就話，佢哋成班泛民踩上領展之後，被領展要求上「火星」，與民隔絕。佢又喺facebook貼圖話，「領展的高層，平日就係喺木星開會」。
八方問過區諾軒，佢話傳媒被領展擲咗去「金星」、抗議者就要到「火星」，而同領展開會時，就去咗「土星」，領展嘅世界，唔通不存在於地球？