教育事務委員會噚日拉隊到葵青區，了解3間火柴盒校舍面對嘅問題。所謂火柴盒校舍即係啲設施低於標準嘅校舍，現時香港仲有28間呢啲學校。身為委員會主席嘅林大輝展示功架，示範點樣促成政府、議會同埋業界和衷共濟，民生先行，皆因委員會上月傾過呢個問題後，大輝成功約到教育局副局長楊潤雄，帶住一班議員去視察。
一入學校，大輝儼如半個主人家身份介紹學校面對嘅問題，例如校舍牆身滲水、石屎剝落、通風差等，有間特別離譜，課室內一幅牆直情有空心磚成舊甩咗出嚟。大輝點解咁清楚？原來其中一個學校，佢已經視察過3次咁多，證明對問題好上心。視察完，大輝宣佈委員會同楊潤雄、學校代表組成三方會議，下月開會探討學校要求盡快重建、重置及維修校舍嘅問題。唔通局長吳克儉冇到，更易達成共識？