才女梁芷珊名下之前馬王「軍事出擊」剛喺女皇盃，以71倍大冷後上殺入亞軍，唔少人事後孔明，話「軍事出擊」話晒係2013年此賽盟主，上仗香港金盃亦得季軍，票數唔應該咁冷落，只因潘頓棄騎而搞到咁好分，真係走晒寶。
8歲老馬「軍事出擊」仲有兩腳，唔止幕後開心，第一次騎佢嘅羅理雅一樣笑騎騎，事關隻馬原先打算換杜利萊，點知女皇盃排位前三、四日先落實由羅理雅出戰，佢話當日「軍事出擊」前段居後走勢好輕鬆，步頭好爽，跑到半程左右已知道有機會上名，最終跑第二有440萬獎金，羅理雅佔5%分得22萬，相等於贏得五場四班賽嘅騎師獎金，綽號「炒飯哥」之羅理雅，講笑話筆錢夠佢買好多碟炒飯。
「軍事出擊」下場再戰，羅理雅都唔肯定自己有冇得騎，佢話最重要係將呢份運氣延續落去。今個星期三佢只騎三匹馬，其中第三場五班1200米隻「你同我定」，季中由苗禮德轉去鄭俊偉馬房後，3戰得1冠1季，表現大有進步，今仗再出羅理雅話隻馬狀態保持勇銳，而且勝在出閘夠快，無論放頭或跟喺領放馬之後，一樣咁好跑，佢話就算只係五班賽，有得影頭馬相一樣咁開心喎！