【專題籽：舖仔小店】
亞視熄燈，無綫不濟，訪問時ViuTv未開台，我問來壹傳媒大樓「倒數收台」的林建明（大姐明）有甚麼想食，以慰心靈。正被化妝師化着妝的她不能斜視，但左手剿手機找資料，右手興奮地拍我的手，「牛油芝士焗龍蝦呀！慈雲山竹園海鮮！我由40年前大牌檔食到𠵱家有三間分店啦，唔係小店喎！不過真係食到我上癮，我去世界各地都搵唔到好味過佢㗎！」一星期後，我們就在尖沙嘴分店大啖龍蝦！她抽着一大個紙袋，裝着三個巨型膠盒，「嗱！我好環保！平時癮起又冇朋友陪我食，就帶着這三個大盒買外賣，一個盛龍蝦，一個盛額外添的牛油芝士醬，一個放麵包！𠵱鋪癮一個月發作一次㗎！」
自從2001年大姐明在亞視錄影廠被佈景板撞傷頭，自言好多細碎事情都記不起了，酒樓老闆陳俊坤（三哥）跟她講鮑參翅肚乜乜乜，她像聽不到，自顧自說：「我去到世界各地，都會點龍蝦，甚至買了芝士和龍蝦回家給工人姐姐煮，但就沒一家像你們弄的好吃！」這裏的菜單全由三哥的二哥（陳炳）負責。二哥周遊列國，有靈感就躲在廚房裏研究。七十年代用牛油跟芝士配搭做醬，用來配蝦、貝類、蟹，最終還是與本地龍蝦最相襯，試過的人都讚不絕口。大姐明成日想入廚房偷師學整芝士醬，但醒目的三哥見她一入廚房就收起芝士，以免秘密外洩。
煮這味牛油芝士焗龍蝦，先將龍蝦下鑊汆水三秒，炒時拉油的溫度不能太熱，然後熄火浸在油裏一兩分鐘，將龍蝦灼至八九成熟，就會彈牙嫩口。最後淋上秘製芝士醬汁。芝士醬汁最重要是芝士品牌，以及所用兩種芝士和牛油的調配比例，連水溫都會影響牛油芝士的幼滑度。這個芝士醬汁，味道40年如一！
《歡樂今宵》飯堂 人均一二百
六十年代大陸走難潮，潮州許多年輕、跟有名飯店學師有成的後生仔逃到香港，當中包括三哥的爸爸。當時九龍城尖東旺角都好多潮州菜館，慈雲山更多。三哥的爸爸以一身廚藝，揹着沙煲走幾層樓上天台，做婚宴和豪門宴席到會。到七十年代初，一家在黃大仙開了大牌檔，不久搬到慈雲山警局對面，舖外擺幾張枱，抄牌上庭阻街當交租！後來附近有吉舖，就擴大版圖。由十來張枱變成五十張，生意越做越大，竹園海鮮飯店的名字亦廣為人知。三哥說：「當時的潮州菜好正宗又好食，香港魚穫又多，你知唔知乜嘢叫魚飯呀，即係食凍魚當飯呀！」烏頭黃花馬友大眼雞、凍蟹龍蝦高高掛，淋上蒜油、醮豆豉、豆瓣醬配上湯就食，方為正宗。大牌檔甚麼客人都有，有着西裝的高官辦飯局，又有新蒲崗工廠廠長帶着加班女工來消夜慰勞，舖內舖外擺滿枱好墟冚，又因為鄰近五台山（廣播道），明星來吃飯，無分貴賤全踎街邊，「以前明星見到市民簽個名，邊似得𠵱家啲明星個個走後門book咗房先食。」
當年大姐明做《歡樂今宵》，經常收工後一行十幾人來食消夜，「嗰陣好好㗎，來到講低人頭消費一百還是二百元，芝士牛油焗龍蝦、瀨尿蝦、魚飯，總之唔使諗就食到好豐富，好抵食。」預約時講低預算，小店就會為你定菜單，還送蔗水、啤酒和青菜，任食蓮花杯雪糕，蔗水落足料，以竹蔗、茅根、馬蹄、紅蘿蔔、芫荽煲幾個鐘，入口清甜。大牌檔「唔諗式」消費，大受顧客歡迎。此時攝影師卻衝口而出：「你哋就唔貴囉！嗰陣我得二、三千蚊人工咋。」曾任職無綫攝影師的他曾到此食海鮮，「記得當年戚美珍和苗僑偉請劇組來吃飯，位位二百，但大家知佢哋包咗好多底！」海鮮，在八十年代香港始終是奢侈食物。這裏招呼開的都是老一輩藝人如梁醒波、譚炳文、李香琴、沈殿霞、盧海鵬和大姐明。大姐明問三哥：「你哋點諗條咁嘅橋？又送嘢飲同甜品。」三哥想了想答：「呃……唔記得了。總之你哋食海鮮都飽，仲食到幾多汽水雪糕吖，咪由得你哋囉！」大姐明記得當年三兄弟造型，「嘩！佢哋班人個個都好大隻，着住背心短褲頸上戴幾條金鏈！好霸氣！」三哥害羞回應：「唏！嗰陣見大佬咁着覺得有型吖嘛！」底衫短褲拖鞋配金鏈傳菜的造型，三哥不肯給我看，上google找又找不到，哪位慈雲山舊街坊有此珍藏請公諸同好！
風光歲月 高官明星姚明座上客
回想經濟起飛的日子，各地旅客跑來就是為食本地海鮮，好多舊客由黃大仙跟到慈雲山再食到尖沙嘴跑馬地及上環。1991年上環分店初開時是香港的全盛時期，那時候最多韓國及日本客人，還有日本網站介紹，三哥說：「我哋唔接平團㗎！每人食四、五百蚊人頭消費嗰啲先接！九十年代，高官、有錢人都喺𠵱度傾生意，佢哋招呼人㗎咋唔係食嘢㗎，四個人叫三四斤蘇眉、三四斤龍蝦、大魚翅咁。姚明都來過，幾風光。唔好講喇，唔記得了。」那時候魚穫由流浮山同鯉魚門魚檔供應，食到沒有本地海鮮，就食進口貨，還好DHL夠快，但還是挽不回潮州菜在香港越來越不正宗的狂瀾，講到這個話題，三哥慨嘆：「𠵱家海鮮來自世界各地，時令嘅馬友、魚、蝦、然後係阿拉斯加蟹、泰國龍蝦、瀨尿蝦等等。」原料問題叫做有錢就解決到，但三哥一直覺得近年香港的潮州菜水準每下愈況，心都灰晒，「𠵱家一孩政策，大陸個個細路仔當寶咁，潮州人都唔捨得個仔入行啦，好嘅潮洲菜師傅都唔嚟做呀。」
現在每有外國朋友回港相聚，大姐明就帶他們到竹園吃飯，一大盆龍蝦額外配一大盆牛油芝士醬，汁都用晒來撈飯，「上次我朋友來，淨係撈牛油芝士醬都食了六碗飯！」一盆龍蝦把大姐明跟朋友的回憶都連上了，但她不愛緬懷舊時，只說：「你知香港舖租貴，又好多嘢變了，真正係本土香港人經營嘅舖頭，其實所餘不多，他們都一直堅持很不錯呢。」
竹園海鮮酒家
尖沙嘴漢口道28號
記者：陳慧敏
攝影：鄧鴻欣
編輯：謝慧珊
美術：吳子豪