西岸PG災難！NBA只係踏入季後賽首圈，多位西岸頂級控衞（PG）已經先後受傷，衞冕嘅勇士證實史堤芬居里（Stephen Curry）右膝韌帶扭傷，要缺席至少兩星期，不過最傷都係快艇，周一作客84:98不敵拓荒者，場數被追成2:2，明星控衞基斯保羅（Chris Paul、CP3）第三節偷波嗰時整傷右手，仲發現掌骨骨折，睇嚟會緣盡季後賽。
西岸四號種籽快艇周一作客拓荒者，不幸場面喺第三節約六分鐘出現，拓荒者後衞G軒達臣（Gerald Henderson）上籃，CP3伸手偷波，但力度過猛壓傷右手手腕，雖然CP3仲勉強帶波過半場，但右手劇痛下都係要離場治理，餘下比賽都冇返嚟。
居里至少唞兩周
冇咗大腦下，快艇亦都以14分輸咗畀拓荒者，場數被追成2:2；快艇官方證實CP3右手掌骨骨折，佢出場嗰時右手已經打晒石膏，快艇教練李華士（Doc Rivers）話：「我哋返到洛杉磯就要同佢詳細檢查，坦白講𠵱家情況唔樂觀，佢係球隊嘅領袖，冇咗佢影響當然大。」美國《ESPN》預計CP3已經收「咧」，CP3今季場均貢獻19.5分及10助攻，缺陣對快艇真係沉重打擊。
西岸PG真係多災多難，勇士嘅居里周日作客火箭再度整親右膝韌帶，好在證實只係一級扭傷，球會預期佢休息兩星期就出得。傷兵成籮、包括PG迪朗威廉士（Deron Williams）受傷嘅小馬，周一作客再以104:118輸畀雷霆，場數輸1:4出咗局，雷霆晉級後會對馬刺。
