早排中大醫學院開記者會，公佈一個有關「小中風」嘅醫學研究，但八方估唔到竟然引起高登熱烈討論，當然一眾高登網民梗唔係關心個研究結果，而係關心記者會入面，有份介紹個研究嘅靚女醫生、中大醫學院內科及藥物治療學系名譽臨床助理教授蘇藹欣（圖）。
曾上陣抗沙士
一大班高登網民大讚蘇醫生好靚女，好有氣質，而八方覺得蘇醫生似李若彤，有高登仔就話似關芝琳加李麗珍。
後來仲有網民搵到蘇醫生係2011年做嘅一篇訪問，先知道佢原來係2000年中大醫學院畢業，畢業幾年就遇上沙士，要上戰場抗疫打仗，早幾年仲做埋媽媽，班高登網民數一數手指，發現蘇醫生原來差不多接近40歲，個個大讚蘇醫生保養得好，靚過唔少後生女。