「股壇開心果」藺常念（藺Sir）一向敢言，繼舊年底忽然炮轟港交所（388）「扶持厚顏無恥企業」後，噚日出席一個電台嘅英文財經頻道做嘉賓時又發功，不過今次唔講金融講政治，大鬧中央政府背棄對香港嘅自治同民主承諾，變相係「港獨」推手，認真沙膽。
68歲嘅藺Sir噚日係節目講講吓油價、議息之際，被主持問到銅鑼灣書局事件對香港金融地位影響時，就借機發火，形容事件根本係「綁架案」，目的係要批評中央嘅人收聲，跟手仲拉埋《明報》喺凌晨開除執總姜國元一齊講，話同樣都係言論同政治嘅打壓。
藺Sir呢次發炮可謂不留情面，講到香港問題十分嚴峻。今時今日仲咁夠膽公開講呢番說話嘅股評人，除咗藺Sir，怕且都好難再數到第二個嘞。