會德豐（020）過去3年推出嘅香港新樓盤名，清一式都只有英文名，一個中文字都唔落，喺大型發展商當中，都算別具一格。
但話分兩頭，山頂超級豪宅啲客，分分鐘英文流利過中文，咁佢聶歌信山道項目叫Mount Nicholson都好合情合理，但去到油塘工業區嗰啲盤，都要叫Peninsula East好似就有啲離地。
佢哋噚日又為旗下將軍澳南第3個住宅項目命名為Savannah。大家真係摸不着頭腦，會德豐喺區內第一個樓盤叫The Parkside，因位處大型綠化廣場隔籬，第二個盤話望海景，於是用意大利一個島Capri命名。
Savannah又係乜呢？管理層解釋話，公司同事一開始會搵世界各地同樓盤位置相似嘅地方去參考，Savannah本身係美國南部一個沿河城市，咁啱新盤喺河道隔籬，於是就用呢個名。