盈盈、樂樂傳宗接代又失敗，令一眾熊貓迷失望，但亦令佢哋可以同粉絲見面，唔使繼續閉門造B！海洋公園鐵定5月舉辦「親親熊貓月」，以多項活動等遊人探訪安安、佳佳、盈盈同樂樂之時，加深了解保育大熊貓嘅重要性。
體驗熊貓護理員 買二送一
遊園要集郵是常識吧！80隻擺咗趣致甫士嘅超萌大熊貓雕塑，會進駐海濱樂園廣場，同兩個熊貓造型嘅巨型立體花藝樹塑，組成最「熊」selfie熱點。
亞洲動物天地則會推出大熊貓日常護理嘅教育導賞項目「大熊貓知多點」，展館內會有多媒體講解大熊貓繁殖中遇到嘅挑戰、熊貓寶寶嘅成長歷程，以及遊人點樣透過日常生活，為大熊貓保育工作盡一分力等。向來受歡迎嘅「大小熊貓護理員」活動則特別推出「二人同行、一人免費」優惠，畀大家同真．熊貓嚟個近距離接觸，皆因參加者可以深入大熊貓嘅後勤基地，學習照顧大熊貓嘅起居生活甚至為佢哋準備膳食，體驗熊貓護理員嘅日常工作。
而破天荒嘅活動則包括大熊貓名字優惠，仲擺明吸香港客人，喺5月1日至31日期間，持有香港身份證嘅香港市民，如果中文名包含熊、盈、樂、安或佳其中一粒字，或者英文名包含PANDA中其中一粒字母，就可以有八折門票優惠；如出現兩個或以上唔同啲字，折扣更加係七五折。睇嚟成個5月，真．假熊貓遍樂園，唔知吸唔吸引到政界朋友入場selfie呃like呢？優惠詳情可以參考海洋公園網站： http://www.oceanpark.com.hk/tc 。
李八方
mailto:[email protected]
