又有上市公司行政總裁（CEO）唔撈，講緊嘅係貴價茶餐廳翠華（1314）CEO兼創辦人之一何庭枝。公司噚日突然宣佈，何庭枝因要投放更多時間喺個人事務，辭任CEO，轉做非執董，今年6月生效。主席李遠康就搵嚟有「蘇豪東之父」之稱嘅彭烱豪接替佢做CEO。
「蘇豪東」係邊度？其實即係西灣河鯉景灣，沿住海濱長廊嘅一批地舖食肆。翻查資料，早年嗰度啲地舖好冷清，直到1999年，彭烱豪喺鯉景灣開咗幾間餐廳，慢慢搞旺個場，所以就有傳媒為佢起咗「蘇豪東之父」呢個朵。
據講，彭烱豪自中二輟學後就出社會工作，喺飲食業打滾近30年。佢將會由6月起接任做翠華CEO，任期為3年，除咗360萬元年薪外，仲可以按表現分花紅。佢有個咁勁嘅朵，大家自然對佢有些少期望嘅。