【專題籽：易零壹綠】
昔日一屋幾件化骨龍，衫裙褲鞋一傳一，不論男女。𠵱家人人只生一個，親朋甚至唔生，童裝唔啱身後，生命未必有take two。網上有很多二手物品買賣群組，不過願意接收童裝的不多，皆因貨品質素單睇相未必可靠。最近有家二手童裝社企開幕，貨品簇新而且可以試身，小朋友的新淨衣物更可拿來寄賣，有兩個小朋友的媽媽梁淑鈴（Sammi）都讚好，環保之餘，亦讓小朋友學懂珍惜。
根據綠色和平去年公佈的調查，香港過去十年紡織物的丟棄量，平均每年達10萬噸，足以鋪滿25,000個香港大球場。每分鐘有相當於1,400件tee被扔棄，大量可重用的衣物枉送堆填區。衣服扔至堆填區後至少200年才能分解，更會釋放甲烷，加劇溫室效應。
提到去舖頭買二手衫，腦海畫面立刻被亂糟糟的衫佔據。Sammi也有同感：「我以為係好殘舊嘅店，啲衫係一堆堆咁，來到發現同我喺外面買衫一樣，衫擺得好整齊。」屬於聖雅各福群會轄下的Green Little有齊2至9歲男女當季二手衫，店舖空間偌大，而且服裝分尺碼陳列，方便選購。
採訪當日，Sammi帶同7歲的仔仔Marcus與六歲的囡囡Chloe到來，小朋友揀衫揀得興奮，店內大部份衫都不過$100，tee $48就有交易，靚靚平底鞋只需$38，小朋友大得快，如想慳錢，與其買新，不如着舊。不過父母最關注的還是二手衣服的衞生問題。破損或有污迹的服裝都會被店員篩走，衣服會用蒸氣掛熨兩次才陳列出來。聖雅各福群會助理項目經理李珮婷說：「我哋鼓勵父母拎童裝來寄賣前，預先清洗乾淨。」寄賣的服裝如果售出，大家可選擇收取定價的百分之三十作為回報，其餘捐出，當然也可把全數捐給社企作營運。如服裝未能於兩個月內賣出，聖雅各福群會會在地區做義賣，或用於其他環保活動，不會浪費了服裝。
「新唔係理所當然」
Sammi平日會讓小朋友穿朋友送贈的舊衣，覺得只要用消毒清潔劑先洗一下就可。「其實今時今日嘅父母都緊張仔女健康，衣服通常保持乾淨，而且會保存得好。」Sammi提到小朋友最初對二手衣物抗拒，卻是教育的好機會，「我會同佢哋解釋舊嘅嘢唔一定唔好，可着可用嘅就唔應該浪費。小朋友物質太豐富，覺得物品係新理所當然，大個咗會唔識珍惜。」她也曾在facebook上的二手交易群組送出童裝，但都未能全數送出。「每個家庭都買新衫，送畀人，人哋都未必要得晒！」買二手衫，幫助源頭減廢，令衣服可在社區重用，也讓小朋友從小就不介意循環再着，值得支持。
店舖除了衣服，也售賣鞋、袋、帽等配飾。Sammi謂即使是鞋，她也不介意買二手。「我相信好多小朋友同時都有幾對鞋替換，佢哋啲腳又大得快，鞋嘅損毀應該唔會太誇張。」如果香港多啲Sammi呢類家長，就多啲童裝童鞋可以逃出堆填區了。
寄賣須知
‧只收80至140厘米（約2至9歲）當季童裝
‧另收九成新鞋子、袋、圍巾、帽子
‧不收破損、起毛頭、欠缺配件、有異味的服飾
‧不收內衣、襪、睡衣、泳衣、校服、戲服等
Green Little
灣仔軒尼詩道302-308號集成中心商場UG8至9號舖
記者：葉青霞
攝影：林栢鈞
編輯：黃仲兒
美術：黃創泰