美聯（1200）炒咗地產女王「AK姐」郭玉滿後，新近推出「推薦計劃」，唔通係走咗好多人，要盡快吸納番多啲人才？不過集團住宅部行政總裁布少明就回應話：「推呢項計劃，與AK姐離職無關。」
布少明解釋，主要因為樓市好番，下半年多新盤推出，舊年12月至今年3月，自然流失咗生產力低嘅人，超過200位，今次係要吸納精英咁話。
推薦計劃上月推出，凡推薦一位舊年喺其他代理行，全年跑數達100萬至200萬元嘅代理，推薦人可獲5,000元獎金，若推薦過去1年跑數達200萬元或以上嘅代理，獎金1萬元。美聯上月靠呢招，請咗30名一年跑數過百萬嘅代理。
嚟緊5月，計劃擴至主管級，推薦一位舊年帶隊跑數500萬至1,000萬元嘅阿頭，推薦人獲7,000蚊；推薦舊年跑超過1,000萬元數嘅，就有1萬元獎金。