睇見法政匯思嘅任建峰Kevin高高大大，一定覺得佢由細到大係大隻仔，「唔係，其實我係孱仔」。Kevin自爆細個矮、瘦、黑，望落似火柴，「阿媽都話我似嚟自埃塞俄比亞」，而且氣管好差，直至小四同家人移居澳洲後身體先至開始強壯返少少！
小學面試鬧校長「死八婆」
Kevin係獨生子，佢話享受自得其樂，可以單丁一個睇書聽音樂好快樂。做得律師，肯定口若懸河？佢承認多嘢講，其中一次口出狂言係小學去面試期間，見到隔籬同齡細路仔同佢一樣扁平足着矯形鞋，遇故知咁同佢雞啄唔斷，點知上午班校長卻叫佢收聲，「我鬧咗佢一句死八婆……」結果上午班嘅面試失敗，𥧌迴路轉，卻係下午班嘅校長收咗佢喎。嘩，咁咪助長鬧人氣燄？又未必，「其實除非好大件事，我都會忍」。不過Kevin小四離港，由於身形較細粒，為免被鬼仔同學蝦，佢喺言語上都要領吓風騷，「把口唔衰啲，點生存呀？咪大家鬥惡囉！」佢同時學空手道傍身，「讀男校，冇計，係有打交文化」。佢話中五學期尾突然標高，至今都唔知道點解。