中環人好多時要坐的士去開會，認真要留意最新嘅支付方法，隨住科技進步，身上冇現金都可以搭的士㗎。
話說繼八達通推出P2P支付應用程式（App）「O! ePay」後，另一電子錢包TNG亦不甘示弱，宣佈與兩大車行「新興車行」同「順安車行」合作，今日起，TNG用戶可透過呢個App畀的士車資。
TNG行政總裁江慶恩亦粉墨登場，示範點用TNG畀錢，只要搵部手機對住司機位後面個「二維碼」，再開App掃描，就可以過數畀司機大佬，睇落都幾方便。
可惜，兩間車行旗下只得2,000部的士，相對全港有超過1.8萬部的士行走。換言之，平均搭9次的士，至有1次機會遇到呢兩間車行嘅的士，幾時先截到部可以用TNG畀錢嘅的士呢？可能要望天打卦囉。