唔係講着衫品味，唔關乎你鍾意金毛MK look，抑或傾情簡約名貴套裝，係講你為公司及產品做宣傳時，表達出來的品味，對人情世道拿揑得有多準，這和負責人的修為學養關係至大，太多關公災難，正源自負責人品味麻麻囉。
依Mary看，最無無謂謂兼抵死的叫「smartass」，好好地，本來風平浪靜，偏要走出來扮醒抽水，可惜眼高手低，無端辣㷫網民，完全係自招煩惱，末了，且不明白何以人哋抽水可呃like，自己抽水惹負評！
上周Prince辭世，震驚流行樂壇，多個外國品牌紛紛表態，起碼有兩三個被網民怒轟，群情洶湧下，火速收回。其中一個係早餐穀物品牌Cheerios，快就夠快，死訊傳出不久就tweet一張紫底白字、只有「Rest in peace」三個字的圖，作為悼念。本來都勉強ok，但主事人懶醒把「in」字上的一點，以Cheerios招牌小圈穀物代替，一念之差，這條小小的宣傳屎橋，就被炮轟抽水發死人財。又係嘅，Prince的形象和早餐產品又確係風馬牛不相及，一句講晒，自取其辱！
係咪完全唔可以表達哀思？又唔係嘅，人哋雪佛蘭汽車咪漂亮得多囉。Prince迷都知道他有首極受歡迎的作品叫「Little Red Corvette」，Corvette正係雪佛蘭一部經典小跑車，咁人哋出師有名，出個以一架紅色Corvette為圖的tweet，也出了全版廣告，寫住「Baby that was much too fast, 1958-2016」。對了，才五十多歲，也太快了吧？就這一秒的低迴，大家便肯定了這是一個tribute，不是純抽水。
所以，品味呢家嘢，有排學㗎！不過冇必要，就無謂自暴其短啦。
彭瑪莉
mailto:[email protected]