「泥地王」終於返嚟喇！周日巴塞隆拿公開賽，西班牙嘅拿度（中）喺男單決賽直落兩盤擊敗日本球手錦織圭，第九次喺呢項賽事封王之餘，仲係職業生涯第49個泥地賽冠軍，追平阿根廷名宿維拉斯嘅紀錄。拿度繼上周蒙地卡羅網賽後再次奪冠，心情當然大靚，呢位世界排名第五嘅29歲球手亦對下月舉行嘅法網勁有信心：「我最近兩星期嘅表現，真係好到令人難以置信。」