今季重組嘅地區球隊元朗苦戰咗成季，前晚反勝黃大仙終於護級成功，球員同球迷當然開心；不過，足主王威信賽後要職員扶住落場慶祝，原來嗰日佢同女子隊友賽時整親膝部，睇埋護級戰先去醫院檢查，認真熱血。
元朗開季15場不勝，到一月底先喺聯賽擊敗標準流浪開齋，但佢哋前日擊敗黃大仙後，提前一輪成功護級，職球員賽後都好激動，但就唔見王威信。原來佢之前幫男子組踢衞生波，對Club One女隊嗰陣意外受傷，搞到行動不便，幾經辛苦去到元朗大球場，單腳企都要同球員握手，之後再去浸會醫院檢查。呢位足球發燒友仲喺fb貼咗張坐輪椅相，話擔心要收山；噚日再了解傷勢，王威信助手就話冇預期咁嚴重，唔使做手術，幾時好番就要睇進度。
身兼足總董事同元朗區議員嘅王威信，又喺fb大讚季中加盟嘅雲迪奴域：「我們的真英雄！在此致以我最深切的慰問及最崇高的敬意！」原來雲迪奴域媽媽上月底逝世，雖然元朗畀佢返祖家處理喪事，但佢堅持留港幫元朗護級，仲着住「與媽媽同在」嘅黑色底衫比賽（圖），結果前日射入一球幫元朗完成任務，賽後激動到跪地追思母親，難怪王威信要多謝呢位咁有職業道德嘅外援啦。