【科技籽：出閘搜新】
生於智能手機時代，很多人印象中的手機，都是巨大的屏幕、呆板的背殼，選購準則只有機身規格。猶幸記者出世得早，那些年，曾見證外表型格獨特的摺機雄霸手機界，雖然風光不再，但今日訪問的兩位嘉賓現在仍然不離不棄。原因？「拎出嚟打電話，途人一定會驚訝，咁高收視率，用新iPhone都未必有啦！」
摺機不死！手機店三禾電氣的老闆Simon說：「香港可以買到嘅摺機唔多，例如舊年嘅三星Folder同LG Gentle，都係老人機款，大大個掣，加埋入門級嘅功能，年輕人未必會揀。」反觀日本一直推出新款摺機，未有斷層，雖然未必配備智能功能，但當地的網絡供應商會提供專用介面，支援LINE、電郵、打機及睇電視等基本功能，「可惜有地域限制，嚟到香港就得物無所用，搞到啲人以為摺機淡出呢個世代！」
除了夠另類夠吸睛，還有甚麼原因令Simon鍾情摺機？「未做手機之前，我係做時裝出入口生意，直到2004年，朋友知我熟電話，搵我幫日版Vodafone 802SE解鎖，見可以當係一門生意，就開咗呢間手機舖。」當時，日版手機動輒三、四千元一部，外加五、六百元的解鎖費，但只有打出、打入及影相功能，絕對是有錢人的玩意！「唔講唔知，嗰時啲人瘋狂到會親自飛去日本買最新款嘅手機，喺等人哋解鎖嘅半年幾時間入面，就只係用部機嚟影相，而且依然咁開心。」
早過自拍神器 09年已有反芒美顏
情迷摺機的還有營業員Emily，「讀書嗰陣見同學用，已經好想買！出嚟打工之後，就開始買嚟用。」她隨身帶着兩部電話，分別是iPhone 6s及2009年推出的SHARP SH-01B，「iPhone係用嚟微信、WhatsApp、上網同打電話，而SH-01B係用嚟煲電話粥用嘅！」很多人說，智能手機通話太久便會發燙，採用2G制式的摺機，兼具通話質素及「涼浸浸」的機身，完全是另一回事，「但行2G都有缺點，就係網絡穩定性差啲，行街傾電話嗰陣間唔中會斷線，所以我會揀留喺屋企或者停喺一個地方煲粥。」至於拍攝功能她也投摺機SH-01B一票，「早喺2009年，佢已經有美顏功能，仲可以反芒用主鏡頭嚟影相，係自拍神器嘅始祖呢！」
同場加映
一機兩芒二刀流
既愛智能手機的便利，又愛摺機的品味？日本Freetel最近推出了一部名為MUSASHI（宮本武藏）的摺機， Android 5.1系統、四核心處理器，配1GB RAM及8GB ROM，特別之處是它跟宮本武藏一樣玩二刀流！除了面蓋，打開機身還會發現另一個4吋（800×480）觸控螢幕，所以無論打開抑或合上，都可隨意使用。機身還支援雙卡雙待、4G上網，並可加插microSD擴充容量，以近年推出的摺機來說，已稱得上中高階機款。
三禾電氣
旺角先達廣場1樓F33
記者：朱崇德
攝影：林栢鈞
編輯：陳國棟
美術：吳子豪