坊間一直盛傳，如果建制派喺嚟緊立法會選舉攞唔到三分二議席，代表特首梁振英大限已到，係時候走；換言之要踢走CY，先要踢走梁粉，所以各路有心人都呼籲大家登記做選民，用選票改朝換代。有「樂壇長毛」之稱嘅音樂創作人周博賢亦搵黃耀明拍片孖住上，呼籲選舉，出戰體育、演藝、文化及出版界功能組別嘅選民，5月2日截止登記日期前火速行動。
顧家煇 林夕 都冇票
八方早前寫過，周博賢考慮循此界別出戰，硬撼現任代表馬逢國。但無論佢係咪上陣，選民都要有票，先喺關鍵時刻發揮到作用。周博賢就話留意，此界別選民登記騎呢位甚多，喺facebook拆解呢個由四業界組成嘅界別，話選民以總會/協會/公司等團體佔多，個人近乎唔能夠登記，所以出現運動員、藝人或歌手、創作人如顧家煇、Wyman同林夕，甚至小型出版社等都冇票情況（情況一如八方，嗚～）
周博賢話留意到部份合資格藝團選民成立多時，「仍未登記或不清楚自己有否登記做選民」，如果唔確定狀態，應致電選舉事務處2891 1001查詢；又提醒大家，「某些個人是有票的（幾平等？！），但只限某些演藝或出版協會的個人會員，呼籲業界填表登記，多一票好過少一票。
覺得好煩？周博賢又點會唔知？但佢話：「花半小時左右完成以上程序，或可改變未來四年在立法會『被代表』的命運，應該值！」佢仲好老套咁講咗句「機會是留給有準備的人」，「況且，我相信今屆是有得揀的」。唔通預告緊，出戰機會唔細？
李八方
mailto:[email protected]