財政司司長曾俊華噚日都幾忙，朝早晚黑都有活動，而佢傍晚出席Thomson Reuters香港辦事處開幕活動時就提到，大數據分析係金融科技發展嘅重要部份，可以為金融機構、電訊企業同電子商貿公司創造機遇。佢話有新辦事處開張，正好反映睇好香港同鄰近地區嘅發展，相信香港可以作為地區資訊交流中心，又話香港若要抓住機遇，就要鼓勵創新。
提到創新，鬍鬚曾都賣花讚花香，話預算案提到嘅創新科技發展，處於政策優先的位置，政府有提供資源幫助行業發展鼓勵創新，包括金融科技等，唔通想喺創新方面同創科局局長楊偉雄一較高下？