大家咪睇雷神贏馬食菜咁易，好多騎師莫講話贏馬，想騎多隻馬都難。
好似新公司騎師寶遜，剛戰首度登場，先後替「金銀花」、「經典寶寶」兩隻馬力拼入Ｑ，大家對佢嘅評價都唔錯，點知本周三(27日)夜馬，佢嘅支持度冇增加不特止，仲慘到只得一隻馬咁大把，就係第四場四班1200米嘅「永神駒」，不過三十五歲的寶遜，相信未必太介懷，日前佢接受馬會訪問，講到明自己的策騎生涯已到中後期，所以估計佢今次嚟香港，唔會有過高期望，亦即唔會太失望。而座騎少還少，「永神駒」由姚力高新勝同程，近績有保證，贏完特登試課大閘先再跑，備戰咁認真，擺明決心爭連捷，同係客串騎師嘅寶遜，要珍惜機會喇！
另一方面，寶遜今期得一隻馬跑，居然未算最霉，本地騎師湯智傑，八場零座騎「被停賽」，想賺1200蚊策騎費都冇，真係冇陰功！除咗冇馬贏，原來湯智傑已連續12個賽日零獎金收入，你話down唔down吖？