「超人」李嘉誠每次一講到自己年薪，就一定好自豪咁話只袋5,000蚊，佢好似唔記得自己係大股東，可以收到好多個億嘅股息咁。恒基地產（012）主席李兆基（四叔）就老實唔客氣得多，股息要收，人工都要照袋，佢有返工做嘢吖嘛，有人工都好正常，舊年仲要加薪16%㖭呀。
根據恒地最新年報，四叔舊年年薪總額2,189萬元，增加16%，當中只包括袍金與薪金，冇獲派花紅，可能佢都費事煩，費事分開幾個項目畀自己。佢兩位公子李家傑與李家誠，就分別袋1,840萬與1,652萬元，較前年加薪4%同11%。
不過，人工對佢哋真係濕濕碎，四叔持有恒地72.5%股權，按舊年兩次派息，成年收取超過34億元股息，人工都係意思意思㗎啫。