佔中令香港每天損失三千五百億！大家還記得某位經濟神級教授「盤數」吧。神級今天又試神經發作，實數預計，港獨會令港樓跌價九成。
不是巴拿馬密件，大家開誠布公討論，港樓跌九成，唔使等埋港獨，只要（一）金正恩自殺式強攻首爾，美軍介入，中國幫拖，太平洋戰事爆發；（二）習總唔知黐了邊條線，失驚無神宣告，解放香港，解放軍長驅直進，禮賓府清空，只剩兩隻無人認領的手提行李；（三）最近香港的國產核電廠隱瞞出事，比福島更福島，香港一夜間無晒貧窮、住屋、教育、土地、政制問題。日日都是港毒。
樓價跌九成，叫價過億的貝沙灣獨立屋入場費一千萬，問吓意向，身兼N家BVI股東的政商名流，會趁低吸納嗎？港獨市，千載難逢，黑錢白金吼到實，包括煥然一居甩底唔去揀樓的八成買家都難免心郁。聽信劉公子建議唔去日本旅行的年輕人諗過度過，儲起來的團費實夠掃兩伙凱旋門！面對樓價冧九成，狼特無需打電話了解，freeze了七秒後，下令龍蝦三母女即刻入市！