雖說香港面對零售業寒冬，但仲有名店逆市擴張。好似位於中環嘅上海商業銀行大廈，翻新後計劃下半年入伙，獲意大利手袋名牌Versace租用地下至1樓共1.2萬呎樓面，預計今年10月開業，作為亞洲區新旗艦店。
聞說呢個大舖嘅招租過程唔簡單，業主原本計劃將地庫、地下連1樓放租，夾埋2.1萬呎，叫租1,000萬元。可惜過去幾年零售市道轉差，舊年減到700萬元，都搵唔到租客。
最後銀行決定收番7,500呎地庫自用，地下至1樓舖位，傳聞減到大約200萬元先至租出，較如意算盤差800萬元。咁轉為自用嘅地庫用嚟做乜？最啱做保險箱服務喇。
如果你係上海商業銀行客戶，行完名店，買完手袋，就可以落一層將戰利品放入保險箱托管，安全可靠，認真係「一條龍服務」！