最近股壇有兩段新聞，一些股評人在專欄叫好，左丁山不以為然。其一是中國內銀之「股代債」，即是借出的錢收不回來，企業無能力還錢，於是改為發行股票給銀行，銀行也就從債主變成股東。以股代債其實係搵銀行老襯，但內地突然有人叫好，難免係simple and naive，蝦群眾唔識計數。
好企業，營運穩健有錢賺嘅企業，一定係有借有還上等人，只有經營不善，或競爭力不如人嘅企業先至係有借不還嘅下等人，銀行借錢出去賺息差，收回貸款天公地道，但下等人唔還錢，仲要銀行做埋股東，解除所有債務，真真有冇搞錯。假如有十間八間下等人逼銀行（配合政府用政策威逼）做股東，上市銀行股東就慘情，最慘係由佢地蒙受損失。左丁山曾與一位資深研究分析師傾過，佢就話：「唔好買內銀股，佢地受中央政策壓力太大，會犧牲小股東利益。」
其二係匯豐放風，可能研究回購股份。匯豐股價長期受壓係事實，左丁山係小股東有切膚之痛，但回購股份，又係搵小股東笨。美國因為有資本增值稅（Capital Gains Tax）及股息稅（Dividend Tax），市場又以大基金投資者為主，大基金不在乎收股息（一收就要交稅），更在乎股價上升，令基金投資可以增值，故此歡迎、鍾意股份回購（Buyback），背後理論係公司在市面買入自己公司股票，減少股票流通數目，於是在盈利不變條件下，每股盈利（EPS）可以上升，假設P/E（市盈率）不變，股價當然上揚，為基金投資增值。
但在香港，稅務從不是一個問題，匯豐小股東好多係長期投資者，揸匯豐揸足三代人都未賣，目的係收取高息，穩定股息。
即使股份回購令股價上升，對呢啲股東嚟講，只不過係紙上富貴，但最實際嘅就係每一季度有股息入袋。匯豐係世界級大銀行（Global Bank），受嚴密監管，資本比率要恒常合乎標準，手頭上資金不足以既回購，又派高息，只能揀一樣，香港小股東一定係揀股息啦，英美嘅基金股東揀股份回購，有啲理由，於是兩批股東意見不合。匯豐管理層要弄清楚：匯豐主要利潤來自香港，2009年供股，主要靠香港，蝕本或冇錢賺嘅地區就係歐美。歐智華等人千祈唔好為咗國際基金而損害香港股東利益！