前荷蘭國腳兼踢過英超利物浦嘅古積特，喺今季回歸荷甲飛燕諾，好多人都覺得，古積特係返去養老，不過35歲嘅古積特，以行動證明自己仲可以替球隊貢獻良多。古積特喺今季荷甲入咗18球，而喺周日嘅荷蘭盃，佢亦正選披甲，雖然冇入波，但就全場奔走，結果飛燕諾憑米高基拉馬同埋艾利亞嘅入球，以2:1擊敗烏德勒支捧盃。唔講唔知，原來呢個亦都係飛燕諾嘅紅褲子教頭雲邦賀斯，執教以嚟嘅第一個盃㖭呀！