金剛與陳蕊蕊驚爆分手結束三年情，蕊蕊被指曾以自殺相逼拒絕分手，她好友王淑玲撐蕊蕊好獨立，又叫大家不需擔心她。
「香蕉」王淑玲：
蕊蕊冇事，唔使擔心，大家畀啲時間佢哋，我支持佢，過一排我會搵佢傾吓偈，𠵱家我諗唔好打擾佢！蕊蕊好獨立，有指蕊蕊曾要脅自殺拒分手呢件事唔係真嘅。
阮兆祥：
年幾前金剛有同我講過分手嘅事，佢話兩個人性格不合，自己當時曾勸過佢哋互相遷就吓，所以知道金剛分手，我一啲都唔覺得驚奇！我覺得金剛處理得好好，作為朋友，我都會祝福佢哋第日會搵到更適合嘅另一半。
林芊妤：
我唔知金剛係咪花心，我又冇同佢拍過拖。唔知道係咪蕊蕊太黐身所以分手，呢啲係佢哋兩個人嘅事，外人唔方便講咁多。
阮小儀：
好突然，金剛平時好少講感情事，但覺得金剛係有計劃嘅人，可能佢覺得呢個係時候。佢好錫女朋友，會將女友嘅事攬晒上身，同埋我同佢去外地拍嘢，佢見到化妝品同鞋，覺得啱蕊蕊都會幫佢買，好錫女友。