到底發生乜事，點解大台啲主播，走吓一個又一個？非常資深、喺無綫任職長達15年半嘅無綫體育新聞主播馮堅成，日前喺個人facebook宣佈已經辭職，據聞過檔樂視，即係仲有機會會粉絲。
「#體育也有貢獻」
馮堅成噚日發表離別感言，話喺無綫時日無多，前晚夢見已故體育新聞主播伍晃榮，自覺自己守唔住對方交託嘅體育「最後防線」，希望向對方講句「對不起」，仲留下hashtag「#體育也有貢獻」，有人覺得暗諷發表過「體育無任何經濟貢獻」言論嘅特首梁振英，同時有人覺得劍指無綫新聞及資訊部總監袁志偉，皆因呢位花哥都唔重視體育新聞㗎噃，一直縮減體育新聞報道嘅時間。馮堅成話感恩一直能寓工作於娛樂，一向認為體育都係新聞，「不應視為雞肋，亦像飯後甜品，吃過後，整頓飯會更滿足」。佢話體育應是面向大眾，不能以個人喜好或專為一個人而做，選材應選擇大眾關心嘅體育消息，「特別電視嘅air time（播放時間）非常有限」。