啱啱喺上周六英超俾紐卡素逼和2:2嘅利物浦，禮拜四對維拉利爾場歐霸盃四強首回合除咗有佐敦軒達臣、安利簡恩同奧歷治缺陣，隨時冇埋未能通過16強次回合賽後藥檢嘅馬馬度沙高，因為呢位26歲法國中堅可能會俾歐洲足協判罰停賽兩年，第二次化驗結果聽日就知。領隊高路普賽後話，沙高事前冇同其他球員講，自己都係上周五先知，未有機會同佢了解事件；佢又否認沙高缺陣係球隊四連勝斷纜嘅原因喎。