唔少中環OL最近嚷着要食抹茶乜乜物物，事關有過百年歷史嘅京都抹茶老店「中村藤吉」喺金鐘太古廣場開咗間pop-up store，試過晏晝一點半經過，竟然賣剩茶葉與朱古力，要等當日下午再來貨，相當誇張。
好在最近喺恒地（012）主席李兆基（四叔）旗下尖沙嘴Mira Mall地下，亦開咗間「中村藤吉Next」，呢間店專做外賣，並非pop-up，主要賣抹茶軟雪糕、蛋糕同茶葉。前日下午去過，雖然要排隊，但職員效率高，加上人龍主要買軟雪糕，大約等10分鐘已經有雪糕在手，可以接受。
等候期間仲見到中原亞太區住宅部總裁陳永傑，佢都係排隊買抹茶軟雪糕，攞到手就同朋友離開了。呢度嘅軟雪糕分為抹茶味（53元）、焙茶味，仲有兩款口味嘅扭紋雪糕，加埋紅豆蓉與白玉丸子，堅好味。店員話，商場入面稍後時間將會有間堂食店，希望唔使排隊排幾粒鐘喇，食甜品啫。