醫管局前主席胡定旭擔任聯席主席嘅先施錶行（444），最近搵來「猛人」坐鎮。公司宣佈委任45歲張小亮擔任聯席主席。
張小亮係美國Aquamen Entertainment董事長與製片人、北京全聯網絡科技創辦人與首席科學家，又係中國延安精神研究理事等等。睇佢又搞電影、又係科學家，公司之後想轉型做乜都得喇！
搵Aquamen資料，公司計劃拍動畫，早幾年傳過話百度創辦人李彥宏入股，張小亮後來話係流料。
而呢隻先施錶行都有故仔，話說「殼后」朱太喺2012年入主公司，主要代理名錶Franck Muller，但做做吓，朱太舊年初搵埋胡定旭，一齊搞博鰲醫療項目，過咗幾個月之後又話計劃告吹，去到9月將29%股權賣畀嘉實基金，𠵱家搵嚟張小亮，真係要睇佢搞邊瓣嘞。