歐聯四強分子喺過去呢周聯賽都贏波，其實八強出局嘅巴塞隆拿亦唔失禮，喺西甲繼續有復蘇表現。繼上場大炒拉科魯尼亞八蛋，佢哋喺上周六聯賽又憑住蘇亞雷斯「大四喜」，以6:0大破希杭，重上西甲榜首；阿蘇仲成為西班牙頂級聯賽歷來第一個連續兩場聯賽都連入四球嘅球員，認真威威！
挾住上周中大勝拉科嘅餘威，巴塞喺上周六迎戰希杭，12分鐘就由美斯先開紀錄；不過，佢哋要到比賽中後段先發威，先靠阿蘇喺63、74同77分鐘建功，之後尼馬喺85分鐘將比數拉開至5:0，阿蘇再喺88分鐘「埋齋」幫球隊大勝6:0，巴塞贏波後以35戰得82分重登榜首。阿蘇除咗成為西班牙頂級聯賽歷來第一個連續兩場聯賽都連入四球嘅球員，兼且喺西甲射手榜以34球壓過31球嘅C朗，可以話係好人好事；原來佢賽前獲得一名患有苯丙酮尿症（PKU）嘅小球迷送贈球衣（上圖），於是應承會以入波報答呢位小球迷，結果真係做到！
