到底《十年》係咪科幻片？八方相信，唔會有人好似經民聯立法會議員梁美芬咁，以為會有「學生踩roller（滾軸溜冰）返學」嘅畫面啩？但查實無論上個抑或下個十年，滾軸溜冰都有唔少愛好者，甚至變身成為滾軸溜冰運動員。
滾軸溜冰有唔同類型，除自由式輪滑，仲有速度滾軸溜冰同講求美感嘅藝術滾軸溜冰等。而目前代表香港出賽嘅藝術溜冰運動員得6個咋，蔡穎怡同范曉晴係其中兩位。
蔡穎怡接受政府新聞網訪問時透露，6歲開始學溜冰，坦承當初純粹因為貪靚，「比賽的衣服很漂亮，又可以化妝」。佢喺舊年同2014年喺全國花樣輪滑錦標賽贏得成年女子組全能同規定圖形項目第二名、2014年喺亞洲輪滑錦標賽全能項目攞第四名。22歲嘅范曉晴就話，花式溜冰有好多跳躍動作，漸漸學識平衡，成功克服困難。獨樂樂不如眾樂樂，佢鼓勵更多人參與滾軸運動，唔知梁美芬有冇興趣試一試？