李嘉欣噚日現身沙田馬場為「愛彼女皇盃」賽馬日擔任主禮嘉賓，同場仲有蔡加讚、何猷亨、鄧鉅明伉儷等。嘉欣穿上Shiatzy Chen春夏新裝，透露老公許晉亨一早已入場，因為老爺許世勳有兩隻馬出賽，連囝囝Jayden都扭計話要嚟，嘉欣話：「之前帶過囝囝去馬房餵馬，佢對馬都幾有興趣，佢有問點解唔畀佢嚟，話下次一定要嚟。」嘉欣希望明年俾囝囝學騎馬，佢解釋：「我覺得細個學平衡同膽量會好啲。」
蔡加讚難辨孖仔
Jayden今年5歲，𠵱家讀緊K2，嘉欣亦開始為囝囝搵小學而煩惱，佢話：「有人叫我大包圍報十幾間，但我怕囝囝混淆，我諗最多都係報三、四間，唔得都仲有政府派位，冇得揀都唔會冇書讀。」嘉欣表示暫無意送囝囝去外國讀書，覺得小朋友學好中文同埋禮貌更加重要：「德育方面好重要，細個唔教大個就冇得教，識幾多個字個個小朋友都差唔多。」
同場嘅蔡加讚指一對孖仔剛滿3個月大，已經幫佢哋改咗中文名叫靖天同靖晨，佢笑言有時都會分唔清佢哋：「喺屋企要一個着藍色衫，一個着綠色衫，因為兩個好似樣。」
撰文：馮仁昭
