正所謂「輸人唔輸陣」，今屆歐聯四強首回合喺周中開打，就算大戰當前，拜仁慕尼黑、皇家馬德里、馬德里體育會同曼城喺上周六嘅聯賽都冇出弱陣，最終齊齊贏波。
皇馬折賓施馬成隱憂
皇馬同馬體會嚟緊禮拜二、三喺歐聯四強首回合，分途出擊鬥曼城同拜仁慕尼黑（見附表），但兩隊家陣同巴塞隆拿爭緊西甲冠軍，所以都唔敢太留力。皇馬教練施丹將沙治奧拉莫斯同莫迪歷先列後備，卻奧斯、加里夫巴利同賓施馬等就照踢正選，但佢哋作客華歷簡奴差啲出事，一度落後0:2，好彩巴利入兩粒加埋盧卡斯華斯基斯建功，先可以反勝3:2。施丹賽後話：「我哋個頭開得好差，但個尾收到好靚。」佢亦證實呢場因傷缺陣嘅基斯坦奴朗拿度（C朗）會隨隊去英格蘭，但踢到42分鐘傷出嘅賓施馬就上陣成疑。
施蒙尼出蠱惑隨時收「咧」
至於馬體會出強陣迎馬拉加，但之前連續五場入波嘅費蘭度托利斯就斷纜，仲有教練施蒙尼疑似「出蠱惑」扔波阻止對手快攻被逐，分分鐘要停賽三場收「咧」，好彩靠後備落場嘅安祖哥利亞喺62分鐘奠勝贏1:0，挾五連勝強勢迎戰拜仁。兩隊贏波後繼續排二、三位，馬體會35戰得82分同巴塞同分，皇馬就落後一分，保持爭標希望。
至於拜仁雖然喺德甲彈出咗，但上周六都冇出弱陣。教練哥迪奧拿只係收起咗隊長拿姆，其他主力好似係紐亞、維達爾、湯馬士梅拿同羅拔利雲度夫斯基等都踢正選，最終靠維達爾同杜格拉斯哥斯達各入一球，作客贏哈化柏林2:0，目前31戰得81分續居榜首，七分領先次席多蒙特，只要贏多一場就攞冠軍。
另外，曼城亦冇放軟手腳，雖然有王牌中場奇雲迪布尼休戰，依然憑伊恩拿祖梅開二度，加埋費蘭度法蘭斯高同阿古路各建一功，主場4:0大勝史篤城。曼城領隊比歷連尼賽後仲話，呢場冇踢嘅費蘭甸奴同隊長高柏尼都冇大礙，周二可以候命鬥皇馬：「要高柏尼喺72小時內打兩場太冒險，所以我哋專登收起佢。」連之前養傷一個月嘅史達寧都已經復出，換言之曼城可以最強陣迎戰皇馬囉。