沙田這天第四場三班草地1200米，在非常大雨中進行，結果由華將攞威，蘇狄雄騎葉楚航馬房「榮光大道」爆冷得手。
「榮光大道」演出越來越神奇，上季連捷於泥地短途1200米，今季一出去年9月中由吳嘉晉爆冷贏谷草1200米，之後一直表現低沉，早排更被安排往上水雙魚河放草一段日子，卒之這天於蘇狄雄胯下齋跑直路百幾二百米，風捲殘雲下，拉士一步於外叠及時追過內側同樣後上如飛的「經典寶寶」，單Win及組合獨贏A3，分別派237及43元。
相反李廐「經典寶寶」呢匹四歲馬女唔好彩，在港初出11倍有支持度，可惜功虧一簣，在新西蘭籍新客串騎師寶遜胯下影相僅敗做阿二，寶遜連同頭場「金銀花」在內，這天初試啼聲頭四場兩度屈居亞軍，尚未打響頭炮。啡燈馬「好益善」於內欄後上，唔夠對手衝只得第三。
最唔好彩係大熱門「魔連奴」，直路中段加速上前走甩晒，最後30米仍佔先，眼看贏得之際，俾三匹追兵先後冚過跌落第四披士都冇，四重彩派35萬幾。而楊千嬅奶奶黃淑貞愛駒「野孩子」，大敗逾40馬位包尾。
「經典寶寶」是全港兩匹雌馬其中之一，另一匹「勝捷勝」於這天頭場跑第四。