家陣創業板股份咁好炒，唔少企業做到符合到上市條件，就申請去創業板上市，建築、飲食、科網、教育等乜嘢類型嘅公司都有，最近發現一間做牙膏嘅內地企業都話申請上市。
一間叫做中國金典嘅內地公司，最近入紙向聯交所申請上市，公司主要以「FE金典牙醫」品牌營銷口腔護理產品，口腔護理產品佔公司過去兩年營業額約40%左右，其餘來自皮革護理與家庭衞生產品，品牌包括有「雪豹」、「老人頭」、「紅牛」、「開利」等。
金典產品主要喺內地銷售，香港人應該好少用到，不過如果有得揀，華華都係鍾意用番由細到大用開嘅牙膏品牌，冇乜興趣試國貨。不過公司話，中國消費者日益關注口腔健康，令到公司有賣嘅功效型牙膏需求有所增長咁話，聽落真係好有潛力咁喎。