周日澳職季後賽四強，常規賽二哥西悉尼流浪者迎戰三哥布里斯班獅吼，主隊23分鐘已經先失三球，包括中場安特里奧擺烏龍，唔少球迷都以為佢哋輸硬。點知西悉靠卡斯迪倫大演帽子戲法，加埋辛達利比建功，59分鐘已經反超前4:3；不過，獅吼射手占美麥卡倫喺81分鐘入波，幫客軍喺法定時間內追成4:4平手，爆出250嘅「和其他」波膽！到咗加時，維度錫喺102分鐘再入一球，最終幫主隊贏5:4，禮拜日會同阿德萊德聯爭總冠軍。