上周六東岸季後賽，黃蜂憑後備上陣嘅林書豪（Jeremy Lin）攻入全隊最高18分，主場以96:80擊敗熱火，將總場數追成1:2之餘，仲終止球隊喺季後賽12連敗嘅頹勢。
林書豪轟18分滅「火」
黃蜂對上一次喺季後賽贏波，已經要追溯到2002年，今場佢哋返到主場鬥熱火，梗係想贏波終止12連敗，避免追平紐約人喺季後賽13連敗嘅尷尬紀錄啦。黃蜂班主米高佐敦（Michael Jordan）都親自到場打氣，而後備上陣嘅林書豪就憑出色表現領軍贏波，佢賽後話主場球迷嘅打氣，令球隊表現得更好，同時希望Game 4可以再下一城，將總場數扳平。至於今場正選上陣打咗34分鐘、射入15分嘅卡明斯基（Frank Kaminsky），亦係黃蜂嘅贏波功臣，不過教練基福特（Steve Clifford）就自爆係聽到MJ同助教伊榮（Patrick Ewing）嘅建議，先夠膽重用呢位七呎新秀：「兩個名人堂成員都嗌我畀卡明斯基落低位單打，我就梗係要照做啦！」