「妳估吓佢幾多歲？」
「50幾歲！」
「其實佢好後生！」
「我都話佢得50幾歲，邊似80幾歲。」
「我20歲咋。」
大家哄堂大笑，笑聲應該傳遍整個將軍澳。以上對話發生在獨居長者黃婆婆的家。記者日前與「兩婆孫」一起探望黃婆婆。但她們其實是兩位少女義工，其中大學生文巧琳（Yuki）化了一個老妝，飾演婆婆。
後生細女因乜事要扮阿婆呃阿婆？原來係想親身了解長者的真實感受，也為長者帶來好玩、搞笑的探訪體驗。這個名為「夢幻耆緣」的探訪活動，由社企HAPPY GRANNIES（耆妙人生）主辦。它利用集資平台「雲集」（cloudonate）籌募活動支出，日前就舉辦了一次探訪活動。
出發探訪前Yuki花了一個多小時化妝，有三位化妝師「伺候」才那麼「快」。化妝師用特製膠水為她弄出皺紋，再畫上斑點，塗白頭髮。為求逼真，手也不能忽略，否則容易露出破綻。
另一邊廂，扮孫兒的義工要上雞精班，熟習昔日香港大事，以便待會跟長者傾偈可以幫「偽長者」應付。基督教靈實協會社工李珮瑜同時講解與長者溝通的技巧，也提醒義工要避開「地雷」。「探獨居老人家時，除非佢主動提起，否則唔應該問及家人，以免觸動佢嘅情緒。另外千萬唔好講潮語及英文，講佢唔明白嘅語言，佢會諗你係咪講緊啲唔想畀我聽嘅嘢呢？」義工通常帶着同情心去探訪，但其實同理心更重要。「要設身處地，站於獨居長者的立場，令佢哋感受到你真係支持緊佢。」
「見習婆婆」Yuki終於化好妝，換好裝，出發去超市買禮物給長者。Yuki全程彎腰、拿拐杖走路，落力維持老態，沒有偷雞。她忍不住講：「真心攰。」超市店員一眼就看出她扮老，到底黃婆婆又會否秒速踢爆佢？
「兩婆孫」入屋後黃婆婆未有發現異樣，而且還把自己的身世故事跟她倆分享。日本仔、打麻雀、多人追，無所不談。直至黃婆婆問Yuki：「妳鄉下喺邊？」她一時答不出，只好支吾以對，差點就被揭穿。蒙混過去後，他們再多談了二十分鐘。之後Yuki揭露身份，告訴婆婆自己只有20歲。婆婆靠近，才發現畫上去的皺紋，又摸摸Yuki的手。黃婆婆大呼：「你哋好搞笑呀，你真係呃到我。」
事後Yuki說扮長者只幾十分鐘，已經累得要命，很難想像婆婆長期彎着腰生活的滋味。活動讓年輕人感受老人的不便，但讓老人家覺得驚喜、好玩才最重要。
我看見黃婆婆笑到眼睛瞇成一線。
查詢：www.happygrannies.org.hk（成為義工）、www.happygrannies.org.hk（贊助活動）
記者：葉青霞
攝影：楊錦文
