上周五季後賽，塞爾特人憑I湯馬士（Isaiah Thomas）轟入職業生涯新高42分，主場以111:103擊敗鷹隊，場數追成1:2。不過今場火藥味甚濃，鷹隊嘅高華（Kyle Korver）同舒路達（Dennis Schroeder），賽後忍唔住一齊鬧綠軍球員插水。
其實都唔怪得高華咁嬲嘅，因為佢喺最後一節尚餘4分33秒左右，見到塞爾特人克魯達（Jae Crowder）射失三分後就想卡位搶籃板，點知呢位鷹隊射手只係輕輕掂到身後嘅史馬特（Marcus Smart）一下，後者就即刻飛出底線，成個動作極為流暢，真係算得上年度最佳插水。
I湯馬士出拳冇被罰
雖然球證並冇因為呢件事而響雞，不過高華賽後就依然好嬲咁話：「喺呢三場季後賽中，綠軍球員不時會做出類似嘅插水行為；好明顯我就冇咁大隻，可以一嘢撞到佢飛開啦！」值得留意嘅係，身高六呎七吋嘅高華只得212磅，而六呎四吋嘅史馬特就有225磅；高華真係要有超能力，先可以搵個背脊撞到對手飛開。而舒路達賽後就喺twitter鬧爆I湯馬士，話喺第一節嗰陣，I湯馬士借啲意一拳打落佢塊面，但就瞞過球證法眼；佢之後喺防守嗰陣撞跌I湯馬士，就被判惡意犯規。不過舒路達可能都知方丈份人小器，怕自己失言又俾NBA追罰，隔咗一陣急急刪走呢篇文。
鷹隊教練保丹賀沙（Mike Budenholzer）話睇完重播，覺得聯盟會追罰I湯馬士，NBA前副主席史頓積遜（Stu Jackson）仲話呢位綠軍主將會因此而喺Game 4被罰禁賽。不過I湯馬士就唔多在意咁話：「我唔係專登打舒路達，不過佢俾我掂到之後就發咗癲咁話我。大家要明白𠵱家打緊季後賽，所有球員都會盡全力爭勝。」