今季德甲爭標形勢基本上都冇懸念，反而下游護級之爭就激烈得多。喺今輪聯賽上演之前，排12位嘅漢堡同16位嘅雲達不來梅只係相差三分，再後一級排尾二嘅法蘭克福亦只係落後不來梅四分，一兩輪聯賽之後隨時換晒位。上周五德甲聯賽，漢堡喺主場迎戰不來梅，靠前鋒拉蘇加梅開二度以2:1擊敗對手，全取三分之後漢堡有37分，即是喺護級區域稍稍彈出，相反不來梅就繼續留喺16位，得番三場波形勢唔算樂觀。