話說第一年大專入學，見到乜都想玩，於是即刻join咗越野跑隊，話入就入，唔使任何測試喎。因為第一次去中大練習嘅時候，其實越野跑隊都仲未夠人，大專盃要求每間學校有六個先可以參加，我哋得四個，冇計，個個多嘢做，阻人兼職折福㗎。何況歷史顯示我哋學校每年都係「包艇」，有年冇「包艇」係因為冇參加，咁又點可以吸引到同學仔加入呢！
慢慢認識咗啲隊友，大師兄Kevin係運動精嚟嘅，最叻係足籃排同吹水，有啲領導feel，對於輸贏嘅執着同佢gel嘅髮型有得揮。最令我驚訝嘅唔係佢彈住跑嘅步伐，而係跑到身水身汗都不為所動嘅髮型。每次佢嘅出現都會令到成隊好熱鬧，不過佢大概每三次練習先嚟一次，大忙人嘛，而難得一次佢亦會順便約吓中大嘅女同學茶聚，非常懂得管理時間。
另一位師兄阿強就完全係另一個style，一睇個平頭裝就知係踏實派，佢唔講嘢，唔係唔鍾意講嘢，係一句嘢都唔講，不過永遠掛住一個微笑，跑嘅時候都會笑。阿強唯一俾人輕視嘅係腳上永遠只着「白飯魚」，響以鞋取人嘅運動世界係典型嘅輸在起跑線。
仲有第三個David仔，佢每次練習都令旁邊嘅人明白，乜嘢叫做有今生冇來世。David仔每次都遲到，又話多嘢做又話要陪女友，下次唔再嚟㗎喇，怪就怪在下次佢又死死氣出現喎，我懷疑其實佢係成隊入面最真心愛跑步嗰個。
當阿sir見到上年走剩三個，再加我一個新丁咁大把，竟然畀咗個任務我，就係去搵第五同六個加盟，好，結果響四年入面，我分別說服咗一位好憎跑步嘅籃球好手，一位從來唔比賽淨係鍾意行山嘅隱世高手，一位練習嗰陣未跑多過一個圈嘅百米飛人，同埋一位聽我講中大多靚女想開吓眼界嘅四眼書蟲加入，收𡃁嘅效率令到阿sir好滿意，不過基本上冇一個第六人係會玩多過一年，而通常離隊之後，起碼唔睬我半年，堅嬲咁款。
四年裏面，我哋最大嘅成就係響最後一年竟然唔係最後一隊返嚟，係尾二，衝線一刻我覺得大家唔再係地底泥，直頭成為咗人生贏家……五分鐘。
KEYMAN
節目主持