中國新一代富豪，新經濟的最大得益者，人所共知係杭州馬雲，潮州馬化騰。阿里巴巴馬畢業於杭州師範學院英文系，騰訊馬畢業於深圳大學計算機及應用課程系，兩馬一文一理，與中國精英大學北大、清華、復旦、交通無緣，而且未做過黨政幹部，能成為世界知名大富豪，係個人智慧、IQ與EQ並重嘅重大成就。你知啦，其他富如王健林、郭廣昌等等，都係靠傳統資產交易模式發達嘅啫，兩馬靠「虛擬世界」、電腦網絡發大財，先至令中國在世界經濟體系得到歐美日各地嘅多一啲重視，亦都為中台港下一代青年人提供一條不拘泥於舊方法嘅新道路，即使在事事箝制嚴密嘅中國，最成功嘅商業奇才，主要仍然係靠自己嘅功力，不靠名校，不靠父幹，不靠地產與貪腐買賣，不靠挪用公款、貪污搜刮。考唔到入清華北大、哈佛史丹福、牛津劍橋嘅三四線大學學生，唔駛驚喎，上述啲名校畢業生，為雙馬打工嘅咋。
馬化騰自己出售騰訊股份，套現百幾二百億港元，係佢自己嘅權利，其他人得個知字就算，但佢在4月18日宣佈分階段捐出一億股騰訊（700），時值167億元，成立慈善基金，就值得我地拍手掌。中港富豪捐錢成立慈善基金，當然以潮州李嘉誠為首，李嘉誠基金估算規模已達728億元（蘋果4月19日），歷年捐款逾200億元，汕頭市大概人傑地靈風水好，先有一位李超人，現在又出一位馬化騰，足以令汕頭及潮州成為中國「慈善之都」。馬雲亦有基金，捐款逾一百億元，其他中台港富豪應該陸續效法啦。
馬化騰基金會做啲乜？據講係醫療教育環保公益之類，以及支持科研，按照美國富豪捐款傳統，馬先生似乎應該捐番十億八億元人民幣俾深圳大學至啱數，以示支持母校教育吖嗎。新一代富豪捐錢，不拘一格，4月18日紐約時報就介紹一位德國美國雙重國籍嘅富豪（出身舊經濟，靠地產股票、對沖基金發達）Nicolas Berggruen，54歲，大馬雲兩年，大馬化騰九年，呢位B先生成立十億美元基金，與別不同，專係研究歐洲與中國融合、中國儒家哲學，請UCLA哲學教授補習儒家學說，辦哲學論壇，捐獎學金俾美國學生到中國深造，又會頒授一個「哲學獎」（獎金一百萬美元），方向與其他富豪基金完全不同，你估到幾時先至會有一個華裔富豪仿效呢？